Лайӑх хыпар: Чӑваш Енри виҫӗ аслӑ шкул Атӑлҫи федераци округӗнчи чи лайӑх аслӑ шкулсен йышне кӗнӗ. Унта И.Н.Ульянов ячӗллӗ Чӑваш патшалӑх университечӗ, И.Я.Яковлев ячӗллӗ Чӑваш патшалӑх педагогика университечӗ, Чӑваш патшалӑх аграри университечӗ лекнӗ.
«РАЭКС-Аналитика» агентство ТОП-100 рейтинг хатӗрленӗ. Унта Раҫҫейри 100 чи лайӑх вӗренӳ заведенийӗ кӗнӗ. Вӗсен ӗҫӗ-хӗлне хакланӑ чухне пӗлтӗрхи кӑтартусене шута илнӗ. Ҫакна палӑртмалла: ку ТОПра ытларах – Мускаври аслӑ шкулсем. Атӑлҫи федераци округӗнчен 15 аслӑ шкул ку списока лекнӗ. Вӗсен йышӗнче Тутарстанри – тӑватӑ, Чулхулари — икӗ аслӑ шкул. Шел те, Чӑваш Енрен ҫук.
Анчах пирӗн аслӑ шкулсем локаллӑ рейтинга лекнӗ. Унта – 52 аслӑ шкул. ЧПУ – 1-мӗш, ЧППУ – 33-мӗш, Чӑваш аграри университечӗ 46-мӗш вырӑнта пулнӑ.
Чӑваш Енре «Сӑра вӗретекенсен шкулӗ» ҫӗнӗ кадр проекчӗ ӗҫлеме пуҫлӗ. Сӑра вӗретекенсене Чӑваш патшалӑх аграри университетӗнче икӗ программӑпа вӗрентӗҫ: «Хӑмла ӳстересси» тата Хӑмла ӳстерессинчи инжиниринг». Вӗренӳ кӑҫал авӑн уйӑхӗн 1-мӗшӗнче пуҫланӗ. Предприятисем унта специалистсене тӗллевлӗ вӗрентме пултараҫҫӗ: заявкӑсене ҫӗртме уйӑхӗн 10-мӗшӗччен йышӑнаҫҫӗ.
Ял хуҫалӑх министрӗн тивӗҫӗсене пурнӑҫлакан Ольга Кудрявцева пӗлтернӗ тӑрӑх: 5 ҫулта Чӑваш Енре хӑмла туса илмелли лаптӑка 2 пин гектар таран ҫитересшӗн. Ҫавна май «Агропродвижение» стратеги хатӗрленӗ. Кунсӑр пуҫне «Чӑваш хӑмли» грант пама пуҫласшӑн.
«Пуринчен малтан» телеграм-канал пӗлтернӗ тӑрӑх, Чӑваш патшалӑх аграри университечӗн ӗҫченӗсем Раҫҫей шайӗнче «Ҫулталӑк инженерӗ-2024» ята тивӗҫнӗ.
Виталий Егоров ӳсен-тӑран ҫитӗнтерес ӗҫре производство процесӗсене сӑнамалли технологисем шухӑшласа кӑларса «Агроинженери» номинацире ҫӗнтернӗ. Антон Степанов вара «Чӑн мар ӑс-хакӑл технологийӗсем» номинацире палӑрнӑ. Доцент выльӑх-чӗрлӗхе лаборатори диагностики тумалли система шухӑшласа кӑларнӑ.
+11.3 °C